Céard lena bhfuil muid ag súil ag Tionól Forbartha na bliana seo? Os cionn 21 cheardlann phraiticiúla do mhúinteoirí, aoiléachtaí ón Ollamh Áine Hyland agus ón Dr Kerron Ó Luain, ceol ó Ghaelscoil Bhréifne, siamsaíocht ó The Bonny Men, mar aon le haonach seastán le breis is 30 eagraíocht agus comhlacht i láthair. Anuas ar an méid sin, déanfar ceiliúradh speisialta ar a bhfuil bainte amach ag Gaeloideachas agus earnáil an oideachais lán-Ghaeilge, agus roinnt de na clochmhílte tábhachtacha le linn na tréimhse sin, agus an eagraíocht ag ceiliúradh caoga bliain faoi bhláth ó bunaíodh í in 1973.

Aoichainteoirí

Tá an-áthas orainn go mbeidh an tOllamh Áine Hyland agus an Dr Kerron Ó Luain linn le súil siar a chaitheamh ar stair na Gaeilge sa gcóras oideachais, mar aon le stair ghluaiseacht na gaelscolaíochta agus an oideachais lán-Ghaeilge, agus stair Gaeloideachas féin mar eagraíocht.

Beidh an tOllamh Hyland ag díriú ar “An Ghaeilge sa Chóras Oideachais in Éirinn: 1922 – 1972” ina haoiléacht a dhíreoidh ar pholasaí Rialtas na hÉireann maidir le múineadh na Gaeilge and múineadh trí mheán na Gaeilge i mbunscoileanna agus meánscoileanna na tíre idir 1922 agus 1972.

Beidh an Dr Kerron Ó Luain, staraí as Ráth Cúil, Co. Bhaile Átha Cliath, ag díriú ar an tréimhse ina dhiaidh sin agus “Cath idir an pobal agus an murder machine”: Gluaiseacht na Gaelscolaíochta c.1973-2023” faoi chaibidil aige. Bhí an Dr Ó Luain i mbun taighde thar a bheith luachmhar le blianta beaga anuas ar thionscadal dar teideal Stair Ghluaiseacht na Gaelscolaíochta, c.1973-2023. Tabharfaidh sé blaiseadh beag de roinnt den taighde sin le linn a léachta agus seans go mbeidh tagairt do roinnt de bhur gcuid scoileanna lena linn!

Cé na ceardlanna a bheidh ar an gclár do lucht na bunscoile?

Beidh réimse leathan ceardlann ar fáil do thoscairí bunscoile arís i mbliana. Ina measc, díreofar ar na hábhair seo thíos:

• An Luath-thumoideachas: sárchleachtas ó scoileanna éagsúla
• An Tairseach: acmhainní praiticiúla don seomra ranga bunscoile agus iar-bhunscoile
• An tríú teanga iasachta ag leibhéal na bunscoile
• Beatha Teanga agus Teanga an tSóisialaithe ag leibhéal na bunscoile
• Bunú agus buanú ranganna speisialta
• Conas tacú le scoláirí a bhfuil disléicse nó deacrachtaí leitheoireachta (Gaeilge & Béarla) acu i nGaelscoil nó scoil Ghaeltachta
• Folláine an mhúinteora: ag tabhairt aire duit féin
• Gníomhaíochtaí ETIM/Mata sa seomra ranga lán-Ghaeilge
• Na cuir chuige, na cleachtais, agus na modheolaíochtaí is éifeachtaí don luath-thumoideachas iomlán
• Nuacht Anois – Acmhainn nua dhigiteach do dhaltaí agus do mhúinteoirí scoile.
• Saibhreas teanga ag leibhéal na bunscoile
• Turas na Scríbhneoireachta

Agus do lucht na hiar-bhunscoile?

Tá súil againn slua mór ó leibhéal na hiar-bhunscoile a mhealladh le bheith linn arís i mbliana. Seo blaiseadh de na ceardlanna éagsúla a bheidh ar fáil:

• Acmhainní digiteacha TG4 don seomra ranga iar-bhunscoile
• Acmhainní úrnua don Ghairmthreoir ón gComhairle um Oideachas Gaeltachta agus Gaelscolaíochta
• An t-aistriú ón mbunscoil go dtí an iar-bhunscoil: deiseanna, dúshláin agus dearcthaí
• An Fhoghlaim Chomtháite Ábhair agus Teanga: Teoiric agus Cleachtas
• An Tairseach: acmhainní praiticiúla don seomra ranga bunscoile agus iar-bhunscoile
• Beatha Teanga agus Teanga an tSóisialaithe ag leibhéal na hiar-bhunscoile
• Bunú agus buanú ranganna speisialta ag leibhéal na hiar-bhunscoile
• Clár folláine ag leibhéal na hiar-bhunscoile: Cleachtais, acmhainní agus cur chuige uile scoile

Ráta speisialta go dtí an 23ú Meán Fómhair

Tá lascaine speisialta mochóirí ar fáil do scoileanna a chláraíonn roimh an 23ú Meán Fómhair. Ní mór ballraíocht le Gaeloideachas a bheith ag do scoil le leas a bhaint as an ráta laghdaithe seo. Gach eolas www.gaeloideachas.ie/claraigh/

Éileamh ollmhór ar lóistín

Moltar go láidir do thoscairí lóistín a chur in áirithe sa Slieve Russell chomh luath agus gur féidir le lóistín ar láthair an óstáin a chinntiú. Tá éileamh ollmhór ar sheomraí i mbliana agus níl ach dornán fágtha. Leis an bpraghas speisialta do thoscairí an Tionóil Forbartha a fháil, bain leas as an gcód GAEL23 ar shuíomh an óstáin www.slieverussell.ie Tá an ráta sin ar fáil suas go dtí an 5ú Deireadh Fómhair amháin agus é ag brath ar sheomraí bheith fágtha!

Ionadaíocht

Ná déan dearmad gur féidir cur isteach ar ionadaí amháin le gur féidir leat féin nó ball foirne eile ó do scoil freastal ar na Tionól Forbartha! Gach eolas ar shuíomh Gaeloideachas.